На 12 декември во Младинскиот културен центар (МКЦ) концерт ќе одржи рок гитаристот Сеад Хаџиќ-Сецко, со кој ќе прослави 40-годишен јубилеј на сцената. Хаџиќ свиреше во бендовите „Ласт експедишн“, „Ексик“ и „Мугер фугер“, а најновиот проект му е „Карла Левински“.
„Со своите пријатели, некогашни и сегашни музички партнери, Сецко ќе нѐ прошета низ најзначајните моменти од опусот на неговите бендови. И тоа нема да биде само приказна од и за Сецко, туку убав историски увид во душата на Скопје. Овој човек има свој мал, но значаен удел во неа“, се вели во најавата на концертот.
На концертот ќе свират и Огнен Мангаровски-Оки, Виктор Гајтановски, Сашо Митревски, Андреј Коларовски, Стефан Момиќ, Андреја Салпе и Андреј Анастасов-Даскаловски. Специјални гости се Енис Хаџиќ-Енко и Димитар Петров од „Ласт експедишн“, Ристо Солунчев-Ицко од „Чиста околина“ и Горан Трајкоски-Готра од „Падот на Византија“, „Мизар“ и „Анастасија“.
Влезниците се продаваат преку мрежата на yournextevent.info.
