Скопското панк трио „Мај тир“ го објави новиот сингл „Сонцето грее само над облаците“, прво издание во новата постава на бендот.
Покрај Дени Крстев (вокал и гитара) во групата се Антони Анев од бендот „Преку ред“ на бас и вокал и Иван Димишков-Димиш на тапани.
Песната е најава за истоимениот трет албум на бендот, кој треба да биде објавен до крајот на следната година. Музиката и текстот се на Дени Крстев, а аранжманот е на целиот бенд.
„Мај тир“ првпат се појавија на домашната и на регионалната сцена со истоимениот деби албум објавен во 2019, од кој се издвоија песните „Остави ме да бидам“, „Лаги шарени“, „Човек од стакло“ и „Крај на јули“. Во 2023, бендот го објави синглот „На старите станици“, а во 2024 го објавија албум „Кога не се сакаме“.
Новата песна e снимена, продуцирана и миксана во студио „1060“ во март 2026 од Дени Крстев.
Видеото за песната е снимено со „Кејв“ продукција, а во главната улога е Џенап Самет. Сценариото, режијата и монтажата се на Филип Лафазановски.
Синглот е достапен на сите стриминг платформи.
