Изложбата „Циркулации“ на Гоце Наневски и Дориан Јовановиќ ќе биде отворена утре (20 октомври) во 20 часот во галеријата „Драгутин Аврамовски Гуте“ при Факултетот за ликовни уметности во Сули ан во Скопје. Кураторка на изложбата е Ана Франговска.
Изложбата го истражува принципот на циркулација преку движењето на материјата, сликата, звукот, информациите и меморијата. Централниот дел го сочинуваат три интерактивни кабини во кои посетителите стануваат активен дел од уметничкото дело. Нивното движење и присуство создаваат различни комбинации од слика, звук и сенки.
Гоце Наневски е редовен професор на Факултетот за ликовни уметности во Скопје, на Катедрата за скулптура и трансмедиумски практики. Излагал во повеќе земји, а учествувал и на Венециското биенале во 2009 година.
Дориан Јовановиќ е електроинженер, тонски инженер и музички автор со долгогодишно искуство. Соработувал со повеќе музички состави и визуелни уметници, а со Наневски претходно го реализирал проектот „На работ“ во Чифте амам во 2024 година.
