Германскиот дизајнер Басе Штитген прави предмети за во кујна од јајца со поминат рок. Како дел од неговиот проект „Како ги сакаш јајцата?“, тој прави шолји за чај, садови и држачи за јајца, обработени со дамки од скршени лушпи.
„Годишно во просек, 6,4 милијарди кокошки снесуваат 1,1 трилион јајца. Истовремено, една третина од целата храна годишно се фрла и таа вклучува и јајца со краток рок на траење, чија кршлива обвивка не е најсоодветна заштита од преработка и транспорт”, вели дизајнерот.
Тој првин ги собирал јајцата од локалните пекари, а потоа ги кршел и двоел на лушпа, жолчка и белка. Белките ги сушел и од нив правел прав, додека лушпите ги толчел на ситни парчиња. Овие две состојки ги мешал и ги ставал во алуминиумски калап, па ги печел на температура од 200 степени.
Топлината и притисокот прават албуминот, што го има во белката, да формира биополимер базиран на проетеини, без какви било додатни пластики.
„Мислам дека освен материјалите што ги користиме, мора да се променат и нашите навики како потрошувачи и нашиот однос кон нив“, вели тој.
