Анталија повеќе од 20 години е најбезбедна туристичка дестинација, велат хотелските менаџери од популарното турско летувалиште.
Според Ѓок Турк, менаџер за сместување во хотелот „Сиам елеганс“ во Белек, поради воените конфликти во Газа и Сирија, на почетокот од годината тој и неговиот тим очекувале послаб интерес од редовните гости.
„Драго ми е што се излажавме, затоа што освен нашите редовни гости што секоја година со радост ги пречекуваме, годинава резервираа и нови од Македонија, Босна и Херцеговина, Русија, Германија, Холандија, Србија и други земји. Местата каде што има конфликт се доста далеку од Анталија и овде нема никаква опасност, а обезбедуваето е засилено. Ние ги имаме содржините кои речиси секој хотел овде ги има: ултра услуга со сѐ вклучено, долга песочна плажа, повеќе базени и ресторани, водени паркови, спа центар, но нашиот хотел се разликува по персоналот кој гостите ги третира како пријатели и нашето мото годинава е ‘добредојдовте дома’“, вели Турк за хотелот кој е изграден во тајландски стил.
Од туристичката агенција „Фибула“, која ја организираше нашата инфо тура низ повеќе места во Анталија, велат дека во оваа област има повеќе од 3.000 хотели, а тие соработуваат со повеќето.
Македонските гости сѐ повеќе ги избираат факултативните тури. Една од најатрактивните е планината над Кемер, Тахтали Даги, на која се оди со жичница наречена „Олимпос Теферик“. Таа се издига на околу 2.365 метри надморска височина и е дел од планинскиот масив Таурус. Од горе добивме прекрасен поглед кон Медитеранот, Кемер и околните плажи. Жичницата има капацитет за 80 луѓе и вози десет минути. Најмногу туристи има во раните пролетни месеци, кога на планината уште има снег, а туристите комбинираат летен и зимски одмор, скијање и плажа.
„Има гости кои доаѓаат во нашите хотели во април, кога на планините уште има снег. Им организираме превоз до ски-центарот на Таурус, а попладне се враќааат во хотелот и одат на плажа или на базените. Тоа е уникатноста на Кемер“, вели менаџерот на хотелот „Шервуд“.
Од регионот, македонските и српските туристи обично одат во Сиде, Белек, Лара и Аланија поради песочните плажи, а туристите од Босна и Херцеговина го бираат Кемер, кој има плажи со ситни камења и најчиста вода.
„Една од најпопуларните и најпродавани екскурзии е рафтингот во Анталија во кањонот Копрулу, која е исплатлива затоа што е излет две во едно. Рафтинг, возење со џип сафари и вклучен ручек е комбинација која авантуристите ја избираат“, вели стружанецот Џелал Кариманоски од агенцијата „Фибула“.
Реката е со тиркизно сина боја, а додека да стасате до местото каде што се трга со чамец, се посетуваат неколку прекрасни предели со незаборавни панорамски глетки. Додека ручате, фотографиите и снимките од рафтинг авантурата се веќе готови.
Популарна тура е и крстарењето од Аланија, со вклучен ручек на бродот, со паузи за капење близу една од најубавите плажи во регионот, Клеопатра.
Неизбежна е и турата во аквариумот во Анталија, еден од најголемите во Европа. Ова е едно од најпознатите туристички места во градот. Најпознат е по огромниот подводен тунел, каде додека шетавме, над нас поминуваа ајкули, ражи и илјадници риби, па чувството е како да си под море.
Во комплексот има повеќе од 40 тематски аквариуми, снежна соба, парк со рептили и егзотични животни, 7-Д кино и музеј со восочни фигури.
Прошетка која не треба да се пропушти е стариот дел на Анталија и Калеичи, едно од најубавите места во целиот град. Името Калеичи значи „внатре во тврдината“, затоа што целиот стар град некогаш бил опкружен со ѕидини од римско и османлиско време.
Во градот ќе ве пречекаат тесни калдрмисани улички, стари османлиски куќи со дрвени балкони, мали хотели, кафулиња и ресторани, продавници за сувенири, турски локум, зачини и старо пристаниште со јахти и бротчиња.
Античкиот град во Сиде е еден од најубавите и најпознати стари градови на турското крајбрежје. Се наоѓа во местото Сиде, меѓу Анталија и Аланија и е познат по тоа што античките урнатини се споени со модерниот туристички град.
Во Сиде има и огромен антички амфитеатар, каде во минатото се одржувале борби и претстави, како и стара римска порта, агора и античко пристаниште. За разлика од Калеичи во Анталија, Сиде има помирна и поромантична атмосфера.
„Прошетките во двата града се популарна тура кај нашите гости и одличен избор“, додава водичот Кариманоски.
М. ЏАРОВСКА
