Критички осврти за 44 изданија од современи македонски и регионални автори се собрани во новата збирка „На полпат: (критика или молк)“ од писателката Оливера Ќорвезироска. Книгата, која е издание на „Арс Либрис“, дел од „Арс Ламина – публикации“, содржи рецензии и колумни пишувани од 2016 до денес.
Во книгата се застапени и критички осврти кон изданијата од повеќе домашни автори од новата генерација: Румена Бужаровска, Калина Малеска, Елизабета Баковска, Лидија Димковска, Владимир Мартиновски, Петар Андоновски, Давор Стојановски, Владимир Лукаш, Сашо Кокаланов, Ивана Трајановска, Игор Стојановски, Ирена Јорданова, Ана Стојаноска, Драгица Најчевска, Игор Анѓелков, Јосип Коцев, Јовица Ивановски и Зоран Анчевски.
(Ре)објавени се и рецензиите за книги од регионалните автори Миљенко Јерговиќ, Дарко Цвјетиќ, Лана Басташиќ, Дамир Каракаш, Кристијан Новак, Огњен Спахиќ, Стефан Тиќми, Александра Јовановиќ и Владимир Зарев.
„Во ова изместено време на многу писатели и малку читатели, реткост е да се најде некој кој посветено чита и пишува книжевна критика. Уште поретко е да се најде писател кој чита и пишува книжевна критика. Од ова, уште поретко е да се најде добар писател кој чита и пишува книжевна критика. А, најретко е да се најде добар писател кој чита и пишува добра книжевна критика, а токму тоа е она што се споило во оваа книга“, вели писателката Елизабета Баковска во својот осврт кон книгата.
Ќорвезироска (1965) е авторка на книгите „Трети кат“, „Високите бели“ (поезија), „Кифличката Мирна“, „Мојот брат од тринаесеттиот кат“ (романи за деца), „Дедо Миле“ (сликовница), „Отвораат ли сништата работа“, „Еден текст и една жена“ (критика и есеистика), „Заклученото тело на Лу“, „Аб’т“ (романи за возрасни), „Страдањата на младиот лектор“, „(С)плетени раскази“, „Две перници“, „(Со)шиени раскази“, „Новелички без шеќер“, „Улиците што ги нема“ и „Престапни години“ (раскази за возрасни). Нејзините раскази се преведувани на англиски, француски, унгарски, албански, чешки, српски, бугарски, словенечки, полски, руски, германски и грчки јазик.
