Уметникот Спасе Перовски денеска во Младинскиот парк во Велес во 19 часот ќе го изложи уметничкиот проект „Зошто“. Настанот ќе трае до 19:45 часот.
Иницијалната идеја за тримесечен партиципативен перформанс со елементи на социјално-политичко структурирање Перовски ја започнува на 28 март 2016, кога лидерите на политичките партии се договорија дека во тековната година ќе има парламентарни избори.
„Ова не е политички проект, туку ликовно дело, кое има директна врска со еден изборен циклус“, вели тој.
Делото го реализираше три месеци пред изборите во 2016 и го заврши два дена пред да се одржат. Секој ден во 18 часот, во Младинскиот парк на бела хартија со А4 формат поставуваше прашање за две проблематики: култура и влијанието на општествено-политичката состојба врз неа низ погледот на уметникот и тогашната политичка сосотојба со целото влијание врз неговите уметност, егзистенција, интегритет и семејство.
Во рамките на изложбата која ќе се одржи два дена пред парламентарните избори ќе бидат изложени дневни весници „Слободен печат“ (септември-декември 2016 година), 91 прашање (септември-декември 2016) и 91 примерок од книгата „Зошто“ (сублимат од перформансот, отпечатена во 2020) како линија во отворен простор долга 27,3 метри.
П. ПЕЧКОВ
