18 ноември е ден кога запира цела Јужна Кореја. Тоа е денот кога стотици илјади средношколци го полагаат исцрпувачкиот осумчасовен приемен испит за националните универзитети, кој се смета за најтежок на светот. И додека властите преземаат вонредни мерки да не се нарушува концентрацијата на учениците, нивните родители одат во храм да се помолат.
Влогот е огромен и нивните идни животи буквално зависат од него. Познат како suneung, тестот е клучен не само за запишување на еден од најдобрите универзитети, туку и за обезбедување повисок општествен статус, профитабилна кариера, па дури и подобри шанси за брак.
Според министерството за образование, оваа година приемниот испит го полагаат 509.821 ученик. За период од осум часа, тие ќе добијат оценки од 1 до 9 за секој од осумте предмети: корејски, математика, англиски, корејска историја, општествени науки, наука, стручни студии и втор странски јазик или кинески знаци.
На денот на тестот, берзите, банките и државните установи почнуваат со работа еден час покасно, се прилагодува движењето на авионите, владата го засилува јавниот превоз за да се избегнат сообраќајни гужви, а полицијата ги придружува учениците кои доцнат.
Огромниот притисок што учениците го чувствуваат во ултраконкурентниот образовен систем на Јужна Кореја се обвинува за честата депресија кај тинејџерите и за стапката на самоубиства, која е меѓу највисоките на светот. Исто така, критичарите велат дека suneung создава систем во кој луѓето од рана возраст се делат на победници и губитници врз основа на еден ден.
