Од денеска до четврток, во Кинотеката ќе се прикажат шест филма од богатата филмографија на Анджеј Вајда (1926-2016).
Филмската недела посветена на легендарниот полски режисер хронолошки ги опфаќа неговите рани, црно-бели трудови „Канал“ (1957), „Пепел и дијаманти“ (1958), „Невини волшебници“ (1960) и „Пепелта“ (1965) и двата најпознати наслова од зрелото доба, „Човек од мермер“ (1977) и „Човек од железо“ (1981).
Неговиот авторски потпис стои на повеќе од 50 филмски и телевизиски проекти од полска и интернационална продукција и има освоено 60 награди на најпрестижните филмски фестивали. Во 2000 му беше доделен и почесен Оскар.
