РЕНЕ ЗЕЛВЕГЕР ДВА ЧАСА ДНЕВНО ЈА ШМИНКАЛЕ ЗА ДА СТАНЕ ЏУДИ ГАРЛАНД

Лос Анџелес, (Си-Ен-Ен)

Продуцентите на биографскиот филм за Џуди Гарланд објавија трeјлер во кој оскаровката Рене Зелвегер е непрепознатлива во насловната улога. Филмот ќе игра во американските кина од 27 септември.

„Џуди“, во режија на Руперт Гулд, се случува околу 1968 година, кога Гарланд живеела и одржала серија концерти во ноќен клуб во Лондон.

„Повеќе од 40 години, Џуди Гарланд се забавувала и сакала, без оглед на тоа што ѝ подготвил животот и токму поради тоа публиката ја обожаваше. Но, таа плати цена: немаше детство во Холивуд, емоционално се исцрпи и бараше ‘нормален живот’ зад виножитото“, изјави режисерот.

„Ова беше магично искуство“, изјави Зелвегер

Зелвегер, која играше во мјузиклот „Чикаго“, самата ги пее песните во филмот. Педесетгодишната актерка посетувала часови по музика, учела кореографија и многу читала за Гарланд. Исто така, поминувала два часа на ден во шминкање, при што ѝ местеле перики, контактни леќи и протези.

„Ова беше магично искуство. Беше големо задоволство да се учи за значењето на оваа личност. Отсекогаш ѝ се воодушевував“, изјави Зелвегер.