Канје Вест навести дека веќе не го поддржува Доналд Трамп и дека влегува во претседателската трка за да победи. Раперот и милијардер викендов на Твитер објави дека ќе се кандидира на годинашните избори, но засега нема потврда дали поднесол официјална пријава.
„Со ова интервју ја симнувам црвената капа. Како и сѐ друго што сум правел во животот, и ова го правам за да победам“, изјави Вест за „Форбс“, алудирајќи на бејзбол капата со слоганот на Трамп „Да ја направиме Америка повторно голема“, со која често се појавуваше во јавност.
Вест кажа дека слоганот на неговата кампања ќе биде „Роденденска забава“. Тој негираше дека неговата кампања има за цел да ги подели гласовите на Афроамериканците и да им наштети на шансите на Џо Бајден.
