До 18 април во Штип ќе трае петтиот меѓународен натпревар на учениците од музички школи од земјата и странство. Организатор е средното музичко училиште во Штип „Сергеј Михајлов“, а натпреварите се одржуваат во Домот на културата „Ацо Шопов“, Мултимедијалниот центар „Киро Глигоров“ и во уметничката галерија „Безистен“.
„Според програмата, натпреварите ќе се одвиваат во сите училишни категории и во повеќе музички програми и дисциплини: дувачки инструменти, ударни инструменти и сет тапани, соло пеење, жичени, лимени и традиционални инструменти, пијано, хармоника и поп и џез музика“, вели директорот на училиштето „Сергеј Михајлов“, Горан Кавраков.
Тој вели дека владее голем интерес за натпреварите и до 1 април се пријавиле над 500 кандидати, млади музичари од земјата и странство. Пријави има и од Словенија, Црна Гора, Бугарија, Албанија и Србија. Организаторот предвидува парични награди и гран при награда за најдобрите по категории и дисциплини.
Т. ЈОВАНОВСКИ
