Што би било ако Македонија биде домаќин на Евровизија во 2134, беше темата на овогодинешното шоу „Глумците пеат“, сношти (29 март) во Националната опера и балет (НОБ).
Низ комично сценарио, шоуто го водеа актерот Горан Ников и новинарката Миланка Рашиќ, која природно е асоцијација на Евросонг.
Слушнавме 27 евровизиски хитови од млади и докажани актери: Весна Петрушевска која настапи со децата од нејзината актерска школа, Тања Кочовска, Гордана Ендровска, Рубенс Муратовски, Нина Елзесер, Наталија Теодосиевска, Жарко Димовски, Тина Трпкоска, Бојан Стојков, Арна Шијак, Жаклина Стефковска, Маја Андоновска- Илијевски, Билјана Драгичевиќ- Пројковска, Петар Горко, Нина Деан, Дритон Вејсели и други.
Дел од нив ги пееја македонските евровизиски хитови како „Proud“ (Горда) на Тамара Тодевска, а видовме и одлична имитација на ХХЛ и „100 посто те љубам“. Имаше и дел за југоносталгичарите, па се потсетивме и на групата „Рива“ од Задар која ѝ ја донесе првата победа на Евровизија на Југославија во 1989.
Евровизија не може да помине ни без Тајчи, „Нови фосили“, Жељко Јокисмовиќ, Руслана, групата „Атена“, „Ацукар морено“, Сертаб Еренер, АББА. Впечатлив настап имаше и Бедија Беговска која претходно ни изјави дека учи руски, а настапи во придружба на Славјанскиот хор во кој членува.
„Имаме пејачи, имаме песни, но немаме сала. Ех, си имаше една сала, универзална за сѐ. Таму имам водено Скопски фестивал, танцови натпревари, домашен избор за Евровизија“, рече Миланка Рашиќ.
„Имам инсајдесрки информации дека Универзална ќе биде готова до 2131, таман пред Македонија да биде домаќин во 2134“, кажа Ников. Негов предлог беше и Евровизија, како и многу нешта кај нас да се отвори со „фрлање лопата“.
Атмоферата ја живна Тања Кочовска која беше задолжена за проверка на издржливоста на столчињата. Како на вистинската Евровизија, така и на оваа генерална проба, се организираше телефонско гласање. Најмногу гласови имаше Жарко Димовски кој беше Здравко Чолиќ во „Гори оган“ (Гори ватра) и Весна Петрушевка која го пееше Јоксимовиќ.
Фестивалските местенки според сценариото на Дејан Пројковски кој го осмисли концептот се неизбежни и на Евровизија. Затоа на крајот, како што на водителот му јавија „од горе“, победи Бајрам Северџан со песната од Тото Кутуњо „Заедно“ (Insieme) со која италијанскиот пејач во 1992 повика на обединување на Европа.
„Глумците пеат“ ги осмисли и организираше Марин Бабиќ, актерот кој почина во 2022 . На шармот на Бабиќ се потсетивме на видеобим на почетокот од шоуто. Во негова чест, ќерките Маја и Ира Бабиќ лани ги вратија „Глумците“ на сцена по 17 години пауза.
Актерите настапија во придружба на Биг бенд со кој диригираше Љупчо Мирковски, а новите аранжмани на сите песни се на пијанистот Бобан Мирковски.
Ана Костадинвоска и Сара Пројковска пееја придружни вокали. Уште една актерска генерална проба за Евровизија ќе се одржи вечерва во Операта, второто шоу на „Глумците пеат“ од 20 часот.
М. ЏАРОВСКА
