Безвременските хитови од блокбастери како „Кум“, „Војна на ѕвездите“, „Офицер и џентлмен“, „Топ ган“, „Валкан танц“, „Телохранител“, „Титаник“ и „Скајфол“ синоќа ја однесоа публиката во Националната опера и балет (НОБ) на патување низ Холивуд од 1980-тите, 1990-тите и 2000-тите.
![](https://smart.sdk.mk/wp-content/uploads/2024/02/dirigent.jpg)
Во полниот салон на НОБ првпат се одржа Оскаровска гала вечер, во пресрет на 96. доделување на наградите на Академијата за филмска уметност и наука на 11 март во Лос Анџелес.
![](https://smart.sdk.mk/wp-content/uploads/2024/02/voditelka.jpg)
Најубавите филмски песни наградени со Оскар или кои беа номинирани ги изведоа поп и оперски пејачи во придружба на Оркестарот на НОБ и Националниот џез оркестар, под диригентство на Бисера Чадловска.
![](https://smart.sdk.mk/wp-content/uploads/2024/02/gosti-red-carpet-6.jpg)
Настапија Весна Ѓиновска-Илкова, Горан Наумовски, Тамара Раѓеновиќ од Црна Гора, Наде Талевска, Андријана Јаневска, Маја Гроздановска-Панчева, Ана Петановска, Ана Мицковска, Игор Дурловски, Даниел Данн и Христијан Тоневски.
![](https://smart.sdk.mk/wp-content/uploads/2024/02/gosti-red-carpet-21.jpg)
Сите изведувачи и оркестрите добиваа големи аплаузи, но публиката буквално срипа на нозе за да ја поздрави Петановска по изведбата на „Виолетов дожд“ (Purple Rain) од Принс, како и примадоната Ѓиновска-Илкова за изведбата на „Скајфол“ од Адел.
![](https://smart.sdk.mk/wp-content/uploads/2024/02/gosti-red-carpet-19.jpg)
Гала вечерта ја режираше Дејан Прошев, а низ историјата на песните од програмата и анегдоти врзани за нив нѐ водеше Миланка Рашиќ, долгогодишна македонска коментаторка на Оскарите.
Настапија и балетските солисти Саша Евтимова и Ендрју Кук (Англија), како и танцовата двојка од „Ритам плус“, Андреј Димоски и Ангела Спировска.
![](https://smart.sdk.mk/wp-content/uploads/2024/02/gosti-red-carpet-12.jpg)
Б. НЕСТОРОСКА
Фото: Ѓ. Личовски
![](https://smart.sdk.mk/wp-content/uploads/2024/02/gosti-red-carpet-9.jpg)
![](https://smart.sdk.mk/wp-content/uploads/2024/02/gosti-red-carpet-16.jpg)
![](https://smart.sdk.mk/wp-content/uploads/2024/02/gosti-red-carpet-3.jpg)