Хит претставата „Мама миа“, по мала пауза, од јануари се враќа на репертоарот на Македонскиот народен театар (МНТ). Премиерата беше пред една година и речиси сите досегашни изведби беа однапред распродадени.
Мјузиклот „Мама миа“, како лиценциран проект со словенечката фирма „Проспот“, во МНТ го поставија режисерката Наташа Поплавска и кореографката Олга Панго, додека текстот на драматургот Кетрин Џонсон, по приказната на Џуди Крејмер, како и песните ги преведе и препеа актерката Тина Трпкоска.
Првата изведба во новата година е закажана за 25 јануари, а билетите по цени од 600, 800, 1.000 и 1.200 денари веќе можат да се купат на билетарницата на МНТ и на интернет страницата на театарот.
Нина Деан, Никола Наковски, Биљана Драгичевиќ-Пројковска, Тања Кочовска, Арна Шијак, Владимир Јачев, Трајче Ѓоргиев, Кире Ѓоревски, Александра Павлова и Билјана Јовановска се дел од големиот кастинг, кој преку хитовите на „АББА “ ја раскажува комичната приказна за тинејџерка која е во потрага по нејзиниот вистински татко на еден грчки остров.
Учествуваат и повеќе придружни вокали и Оркестарот и балетскиот ансамбл на Македонската опера и балет (МОБ), а ќе диригира Бисера Чадловска. Сцената и костимите се на Александар Дениќ и на Роза Трајческа-Ристовска.
