Кантавторот, мултиинструменталист и продуцент Иван Кукиќ го објави својот нов албум „Маѓепсан круг“ (Začarani krug) со 11 авторски песни. Албумот е во издание на „Крација рекордс“ и доаѓа по албумот „Sunday Vibes“ од 2023. Тој носи препознатлив звук што обединува рок, џез, светска музика и современ кантавторски пристап.
Покрај Кукиќ, кој свири бас и акустична гитара и ги пее вокалите, на албумот учествуваат и Зоран Трендов, Влатко Сапламаев, Марјан Стоилов, Стојан Иванов, Слободан Кржев и Кирил Кузманов. Посебен белег му даваат гостите: џез саксофонистот Кирил Кузманов гостува на песната „Одам“, Васко Тодоров на „Без компас“, а во „Молитва за љубов“ се појавува легендарниот Раде Шербеџија.
Албумот е мастериран од Борис Шурлан во „Миднајт студио“, а визуелниот изглед е на Георги Кончалиев и Оскар Пигац.
Иван Кукиќ со години е активен и како басист во триото на Влатко Стефановски, паралелно градејќи и успешна соло кариера.
