АИ ВЕИВЕИ ЌЕ ГО ОСВЕТЛИ АМСТЕРДАМ СО ИНСТАЛАЦИЈА ОД 6,5 КИЛОМЕТРИ

Амстердам, (Гардијан)

Оригинални дела на Аи Веивеи и на Сесил Балмонд ќе бидат откриени оваа недела во Амстердам, во рамките на годинашниот Фестивал на светлината.

Почнувајќи од утре, градот ќе биде осветлен со 36 инсталации, дизајнирани специјално за фестивалот, кој се одржува веќе шеста година.

Фестивалот ќе има две главни локации, при што изложбата на вода ќе биде отворена до 21 јануари и ќе содржи 21 дело, вклучувајќи ја распукнатата пирамида на Балмонд.

Изложбата на вода ќе содржи 21 дело, вклучувајќи ја распукнатата пирамида на Сесил Балмонд (Фото: Фестивал на светлината)

Инсталацијата на Веивеи, наречена „Тенка линија“, ќе се протега низ градот во должина од 6,5 километри, претставувајќи граница.

Изложбата на копно ќе трае до 7 јануари и ќе биде поставена на историското пристаниште на островот Катенбург, недалеку од централната железничка станица. Меѓу 15-те дела се издвојува инсталацијата на уметникот Алекс Пи, која се состои од 576 ЛЕД-светилки.