Уметност направена од отпушоци од цигари доби дозвола да се изложи во нова галерија, за да го потенцира проблемот со загадување и да ги поттикне луѓето да се откажат од пушење. Пензионираниот фармацевт Негвени Ел Асал собрал над 120.000 отпушоци од цигари од улиците на Блекпул и од нив создал мозаици.
Тој вели дека луѓето преку неговата уметност ќе можат да научат од што се направени цигарите. Меѓу неговите мозаици има череп направен од 7.500 отпушоци, како и слики од пирамиди, изгрејсонце и од магаре. За да не му се разместуваат, тој ги лепел со паста за заби, а плус, така се губела и миризбата.
Ел Асал направи и знак за забрана на пушење од стари хартиени ролни и филтри за да ги спореди искористените и неискористените филтри и да го покаже влијанието на цигарите.
Ел Асал вели дека собира отпушоци уште како дете, кога им помагал на деца бездомници во Египет, кои тргувале со цигари во замена за храна и сместување. Кога се преселил во Блекпул, забележал дека ги има многу по улиците и од општината добил помош во вид на опрема за собирање. Тој вели дека знае за опасните материјали кои ги има во цигарите и затоа не сака да стигнат до галебите на приморскиот град.
