АВАНГАРДНАТА „ИЛИЈАДА“ ЗА КРАЈ НА 58. ОХРИДСКО ЛЕТО

Охрид, (СМАРТ СДК.МК)

Словенечката претстава „Илијада“ од Хомер, во режија на Јернеј Лоренци, вечерва во Антички театар ќе го затвори 58. издание на фестивалот Охридско лето.

Претставата е копродукција на Словенско народно гледалишче-Драма Љубљана, Цанкарјев дом и на Градски театар од Љубљана, а ќе се игра од 21 часот.

Според словенечката театарска критичарка Ника Архар, претставата е иновативна и величествена.

„Колку што е класична, толку е и инспирирана од европската театарска авангарда, со суптилни совети на модерната историја на Балканот. Изведбата почнува како концертна верзија на една опера и актерите во формална облека седат на столови, раскажувајќи ја крвавата историја за ‘Илијада’ на микрофони. Микрофоните не се само за да се збогати звукот на зборовите, туку целата изведба е изградена од музика и од поетскиот ритам хексаметар, слично како отчукувањата на срцето и одекот на коњскиот кас. Раскажаниот вовед полека прераснува во едно целосно театарско доживување“, стои во нејзината рецензија.

Охридско лето траеше 40 дена, а годинава учествуваа над 800 уметници од 27 земји.

Д. ЧУБРИЌ