„Сакаме да промовираме песни со повеќе забавни жанрови кои ќе опфатат поширока публика, не зборуваме само за хитови какви што досега донел Макфест, туку за музика и мелодии чии рефрени ќе се потпевнуваат и ќе се паметат“, рече уметничкиот директор на Макфест, Роберт Саздов, на прес-конференцијата во Штип.
Продуцентот Јован Јованов, кој е дел од уметничкиот совет, кажа дека Дарио (фото), кој ќе пее на втората вечер на 26 октомври, последен пат настапил на Макфест во 1998.
„Дани Димитровска ќе пее исто така, а и таа не била долги години на Макфест. Освен Елена Ристеска, за првпат пее и Павле Камиловски“, рече Јованов.
Годинашниов, 39. по ред Макфест, кој ќе се одржува на 25 и 26 октомври во Домот на културата „Ацо Шопов“, е со најголемата музичка конкуренција досега. Пред три години сегашниот уметнички совет на фестивалот започнал со 15 пријавени песни, наредната година биле 56, а годинава во селекцијата биле рекордни 76 композиции.
„За поздрав е што меѓу учесниците ќе има голем број дебитанти, повеќе млади музичари, поранешни победници на музички натпревари во регионот. Деновиве интезивно се работи на уредувањето на сцената“, вели продуцентот на фастивалот Александар Арсовски.
Градоначалникот на Штип, Иван Јорданов, се надева дека догодина, кое е јубилејното 40. издание, Макфест ќе добие поголема финансиска помош од Министерството за култура од годинашниве 1.000.000 денари.
И годинава, како и лани, на Макфест ќе нема парични награди. Фестивалот е од ревијален карактер и единствената награда која ќе се додели е за најслушана песна меѓу двата фестивала, која ќе се објави по завршувањето на втората фестивалска вечер. Водители се Димитар Атанасовски и Маријана Станојковска.
Т. ЈОВАНОВСКИ
