Книги со попуст до 70 отсто ќе се продаваат на јубилејниот, 30. Саем на книга, кој од денеска до 9 мај ќе се одржува во ВИП арената „Борис Трајковски“ во Скопје.
Слоганот е „30 години читаме со задоволство”, а според организаторот Скопски саем, ќе учествуваат околу 70 издавачки куќи од Македонија и од регионот (Србија, Црна Гора, Косово и Албанија).
За време на Саемот, издавачите најавуваат промоции, средби на авторите со читателите и семинари.
За подобар пристап до Саемот, на барање на Скопски саем, ЈСП воведе две нови автобуски линии кои ќе водат до „Борис Трајковски”. Од денеска до 9 мај, линијата 100/1 ќе сообраќа од населбата Ново Лисиче до „Борис Трајковски“ од 11 до 19 часот, а линијата 200/1 од населбата Дексион до арената.
Билетот за Саемот на книга чини 30 денари, а влезот за сите групни и организирани посети на ученици ќе биде бесплатен.
Работното време на Саемот е од 10 до 20 часот.
