Германскиот режисер со турско потекло Фатих Акин, чии филмови се исклучително познати и омилени кај македонската публика, следниот месец ќе биде специјален гостин на Интернационалниот фестивал на филмска камера „Браќа Манаки“ во Битола. Јубилејното 40. издание ќе се одржи од 14 до 21 септември.
Акин е добитник на награди како Златна мечка во Берлин (2004) и Златен глобус за најдобар филм од странско говорно подрачје (2017).
„Акин ќе одржи работилница во Битола заедно со Рајнер Клаусман, наш лауреат. Акин е германски режисер со турско потекло, роден 1973 во Хамбург, уште таму живее. Почнал со кратки филмови, а потоа добивал светски награди за големи филмови. Златна мечка на Берлински фестивал, потоа со филмот ‘На работ од рајот’ награда на жирито во Кан за најдобро сценарио, во 2017 и 2018 најголемите награди за филмот ‘Од ништо’ и тоа Златниот глобус за најдобар филм од странско говорно подрачје, а годинава со ‘Златната ракавица’ на Берлинскиот фестивал“, вели Гена Теодосиевска, директорка на „Браќа Манаки“.
Фестивалот денес го претстави и видео спотот изработен за значајниот јубилеј на фестивалот, чија авторка е режисерката Дина Дума, кинематографер е Наум Доксевски, со актерката Наташа Петровиќ и на кој работеше бројна екипа. Годинашното мото на „Браќа Манаки“ е „ Кажи им на облаците“.
Ж. ЗДРАВКОВСКА
