Најпопуларните песни од поп-рок и панк музиката кои ги одбележаа 1990-те, се на програмата на вечерашниот концерт на Филхармонијата, од 21 часот во Градскиот парк.
Концертот насловен „Љубов и револуција“ е втор од циклусот Филхармонија на отворено. Во неделата Филхармонијата пред бројна публика го одржа концертот „Ну погоди“.
Под диригентство на Џијан Емин и во негови аранжмани ќе бидат изведени песни на култните „Рејдиохед“, Ник Кејв, „Бисти бојс“, „Продиџи“, „Нирвана“, Дејвид Боуви, „Секс пистолс“, „Клеш“, Џими Хендрикс, „Пинк флојд“, „Рамштајн“. Заедно со Филхармонијата, ќе настапи и хорот „ПроАрс“ чиј диригент е Сашо Татарчевски, кој ќе биде главен носител на проектот.
„И овој концерт, како и првиот, претставува уникатна идеја во смисла на тоа ваков тип на композиции да бидат изведени од страна на симфониски оркестар и хор, што е ретка практика и во светот“, вели директорот на Филхармонијата Виктор Илиески.
„Љубов и револуција“ и „Ну погоди“ се реализираат во соработка со Младинскиот културен центар (МКЦ) и Град Скопје.
