Нова музика од Крис Корнел ќе биде објавена повеќе од една година од неговата трагична смрт.
Вдовицата на легендарниот гранџ музичар, Вики, стои зад новиот албум едноставно насловен „Крис Корнел“, а во исто време, на 16 ноември, ќе биде објавена и колекција од четири цедеа.
Првата песна од двата проекти се вика „Кога лошиот прави добро“ и Вики Корнел вели дека целиот материјал доаѓа од архивите на нејзиниот покоен сопруг.
Колекцијата ќе содржи и 11 досега необјавени песни. Во двата проекти се вклучени соло материјалот на Корнел и музиката што тој ја правеше со бендовите „Саундгарден“, „Аудиослејв“ и „Темпл оф д дог“.
„Овој албум е за неговите фанови и со него сакам да ги потсетам луѓето на сите аспекти на Крис: тој беше пријател, сопруг и татко, поет и уметник, иноватор кој не се плашеше да презема ризици“, изјави Вики Корнел.
Корнел (52) почина во мај минатата година и неговата смрт која го шокираше светот беше оценета како самоубиство.
