Легендарниот гитарист Влатко Стефановски одржа двочасовен концерт во Домот на младите во Штип, во рамките на Штипското културно лето. Настапот започна и заврши со голем аплауз на полната летна сцена..
„Уште од млад знаев дека Штип е рокерско место, рокерски град. Овде запознав многу добри и интересни луѓе, кои секогаш ми го олеснуваа престојот“, рече Стефановски.
Тој се наврати и на периодот кога како помлад настапувал во градот.
„Во 1983 гсвирев со војничкиот оркестар и настапував во Офицерскиот дом. Во тоа време бев војник речиси една година. Од тој период носам многу пријатели и голема носталгија. За жал, некои од нив повеќе не се меѓу нас“.
Тој зборуваше и за својата меѓународна кариера, а ги спомена настапите во Велика Британија.
„За мене е големо признание што во 2013 година свирев со Лондонскиот симфониски оркестар, а во 2024 снимав албум во Лондон, во студио каде што работеле ‘Битлс’ и ‘Пинк Флојд’. Тоа за мене е врв во кариерата“, рече Стефановски.
Тој додаде дека ваквите успеси му значат исто колку и настапите дома, како што е концертот во Штип.
Стефановски настапи со Иван Кукиќ на бас гитара и со синот Јан Стефановски на тапани. Кажа дека Јан дипломирал на Факултетот за музичка уметност во Штип.
Т. ЈОВАНОВСКИ
