Менаџерот на забавни и културни настани Владимир Мандичевски-Манде сношти (8 февруари) ја промовираше својата прва книга „Јас пратеник“.
Мандичевски, кој со години беше сопственик на култната скопска музичка продавница „Баги шоп“ и е добар познавач на разни музички правци, овојпат се занимава со политика на сатиричен начин, преку Ристе Трпеновски, главниот лик во книгата.
На детален начин, актерот Рубенс Муартовски го опиша Ристе, читајќи делови од книгата на кои многумина од гостите на промоцијата се насмеаја. Живеејќи мирен живот во селото Зимзирово, каде што има две продавници и една земјоделска аптека, неговиот живот се врти во сосема друга насока откако ќе стане пратеник. Промотор на книгата беше дипломатот Милан Јазбец, поранешниот словенечки амбасадор во Македонија и пријател на Мандичевски.
„Книгата е голема сатира, но полна е со селски, човечки мудрости кои се присутни и во денешно време. Додека ја читав, го совладував смевот, па потоа паѓав од смеење кога Ристе, кој не знае англиски, со професорот Шекспир го учи јазикот за да може да стане политичар“, рече Јазбец.
„Манде ме научи дека музиката не се само ‘Дорс‘ и ‘Цепелин‘, туку треба да научам да слушам и други музички правци. Тоа беше негов подарок за мене“, рече актерот Рубенс Муратовски.
„Ристе е интересен лик, селанец кој и покрај тоа што не знае странски јазик, ќе стане пратеник. Ќе го сретнете на секој чекор околу нас“, ни рече Мандичевски по промоцијата и се присети на анегдота со Јазбец.
„Триесет години колку што организирам концерти, никој од медиумите не се заинтересирал да тргне со нас на турнеја. Милан Јазбец посака да дојде на пат со нас и со Влатко Стефановски, се возеше во комбе со нас, спиеше по хотели и седеше во ресторани до сабајле“, рече Мандичевски.
Тој најави дека преговара за театарска претстава направена според книгата, а можно е „Јас пратеник“ да се преведе и на други јазици.
Издавач на книгата е „Баги комуникации“, а уредник Маја Бабиќ. На промоцијата свиреа пијанистот Бобан Мирковски и Гоце Димовски на кавал, кои Мандичевски ги нарече музичари со светски талент.
М. ЏАРОВСКА
