На вчерашната свеченост на доделување на наградите на Фестивалот на античка драма „Стоби“, без претходна најава, беше доделена и актерската награда за животно дело „Петре Прличко“, што ја доби актерот од Битолски театар, Слободан Степановски. Таа е за минатата година, кога поради пандемијата на ковид-19 не можеше да му биде врачена.
Степановски бил спречен да допатува во Велес, па наградата ја прими неговата ќерка Викторија Степановска-Јанкуловска, исто така актерка во Битолски театар.
„Денес е реткост да имаш свое јас. Уште поголема реткост е таа големина да биде препозната“, порача таа во име на нејзиниот татко.
Наградата се состои од плакетата „Петре Прличко“ и 30.000 денари, што ги доделува Општина Велес. Таа вообичаено се доделуваше на Денот на Општината, 9 Ноември.
„Степановски како тимски играч истрча 43 години долга и пребогата кариера, обележана со дури 90 ролји. Прличковец без дамка и задршка. Голем актер, достоен на небесниот ктитор на оваа награда“, образложи жирито.
П. ПЕЧКОВ
