Со забава на која настапи бендот „Амбасадор“ од Лондон, винаријата „Камник“ прослави 20-годишен јубилеј. Настапи и кабаре составот „Лакшри кабаре“.
Винаријата беше отворена во 2004 со пет хектари лозови насади, кои денес прераснаа во близу 40 хектари. Започна со производство од 10 тони грозје и 10 дабови буриња, а сега, по две децении, преработува 500 тони грозје и располага со 500 дабови буриња. Во овој период се создадени повеќе од 25 различни вина, произведени од повеќе вински сорти.
Во 2011, „вранец терои“ е прогласено за најдобро црвено вино во Централна и Источна Европа на светските награди „Декантер“ во Велика Британија, а „ten barrels syrah reserva“ повеќепати освои златни медали и е прогласувано за едно од најдобрите 10 „syrah“ вина во светот.
„Камник“ е првата македонска винарија која направи етикета за вино од уметничко дело, Carmenere 2019 на уметникот Михаил Корубин.
„Камник“ низ годините стана партнер и на многу ресторани со Мишелин ѕвезди, па нејзини вина денес има во ресторани во Англија, Германија, Швајцарија, Словенија, Хрватска и други земји, а може да се најдат и во музејот на виното La Cité du Vin во Бордо.
