Дизајнеритe Ана Тасева, Гоце Велески и Воскресија Андреевска и средношколците Амра Седиковиќ, Давид Манасијевиќ и Адријана Мирчевка ги добија наградите за најдобри решенија на повиците за визуелни дела на тема трансплантација и органодонорство. На конкурсот пристигнаа над 120 дела, а изложбата со 20 дела синоќа (26 март) се отвори во „Ист гејт мол“.
„Да се дарува орган е еден од најблагородните чинови што може да се направи. Донирајќи орган, вие донирате живот на друг човек. Благодарност до сите кои учествуваа, талентот е евидентен. Ова е можност да ве охрабриме да ја пренесете пораката и да зборувате со вашите најблиски, со вашите семејства, колеги на работа, соседи за придобивките што ги носи донирањето органи. Доколку бидеме свесни, можеме заеднички да спасиме животи“, изјави евроамбасадорот Дејвид Гир.
За најдобрите решенија и за делата кои се дел од изложбата, одлучуваше петчлено жири кое го сочинуваа: Дита Старова-Ќерими (уметница), Зоран Кардула ( дизајнер), Томислав Георгиев (фотограф), д-р Маја Мојсова-Мијовска (национална координаторка за трансплантација) и Радмила Живановиќ (психолог).
„Сакаме и на младите да им ја пренесеме пораката дека не постојат табу-теми и теми за кои се плашиме да зборуваме. Неопходен ни е разговор дури и на тие теми и притоа мора да градиме ставови. Некогаш животот нè носи во ситуации кога е потребно да се донесат важни одлуки. Органодарувањето е една од тие одлуки“, вели д-р Мојсова.
Ана Тасева ја доби наградата за најдобар постер, наградата за најдобро лого ја доби Гоце Велески, а слоганот на Воскресија Андреевска, „Промени го крајот на нечија приказна“, ќе биде присутен во тековната брендинг кампања на сите решенија.
Настанот е дел од проектот „Поддршка на системот за трансплантација“, финансиран од Европската Инија, во кој краен корисник е Министерството за здравство.
Фото: Т. Георгиев
