ДИГИТАЛНО УМЕТНИЧКО ДЕЛО СОЗДАВАНО 13 ГОДИНИ СЕ ПРОДАДЕ ЗА РЕКОРДНИ 69 МИЛИОНИ ДОЛАРИ

Њујорк, (Би-Би-Си)

„Кристис“ ја организираше првата аукција на дигитални уметнички дела, што му донесе над 69 милиони долари на уметникот Бипл. Дигиталните дела се продаваа во форма на НФТ (non-fungible token), последната технолошка лудост која се здоби со голема популарност во изминатите недели. НФТ служи како уникатен идентификатор на сопственост за нефизички предмети.

Бипл, чие вистинско име е Мајк Винкелман, креира едно парче на дигитална уметност секој ден и сега ги продаваше првите 5.000 дена од својата работа.

Мајк Винкелман вели дека ова е почеток на ново поглавје во историјата на уметноста (Фото: АФП)

„Ова го сместува Бипл меѓу тројцата највредни живи уметници. На аукцијата беше поставен нов светски рекорд за дигитално дело“, соопшти „Кристис“.

Делото „Everydays: The First 5.000 Days“ претставува колаж од илјадници поединечни слики што овој американски графички дизајнер почнал секојдневно да ги прави во почетокот на 2007 година. Тој користи различни дигитални моделирања и уметнички програми за да ги создаде. „Кристис“ кажа дека 22 милиона луѓе ги следеле последните моменти од онлајн аукцијата, кога била достигната цена од 69.346.250 долари. Идентитетот на купувачот не е објавен.