НОВИОТ САТЕЛИТ НА НАСА КОЈ БАРА ВОНЗЕМСКИ СВЕТОВИ СНИМИ ФОТОГРАФИЈА СО 200.000 ЅВЕЗДИ

Њујорк, (Мешабл)

Телескопот на новиот сателит на НАСА ја испрати првата фотографија, откако тргна во потрага по вонземски планети и сите ги остави без здив.

Вселенското летало ТЕС успеа да фати повеќе од 200.000 ѕвезди во една фотографија, додека тестираше една од четирите камери.

Но, тоа е само мало парче од галаксијата што ТЕС ќе го проучува, барајќи вонземски светови, што е негова примарна мисија, објави НАСА.

Во видното поле на ТЕС ќе бидат 20 милиони ѕвезди. – Првата тест-фотографија (Фото: НАСА)

„Се очекува ТЕС со своите четири камери да покрие 400 пати повеќе од она што е прикажано на првата тест-фотографија, во текот на почетните две години од својата потрага“, се вели во соопштението на НАСА.

Сателитот е дизајниран да открива нови светови со користење на транзитен метод, што значи дека тој ќе ја набљудува светлината на една ѕвезда во оној момент кога планетата поминува пред својата ѕвезда-домаќин. ТЕС ќе може да создаде слика за орбитите на тие светови и ќе оценува дали на нив има услови за живот.

Севкупно, во видното поле на ТЕС ќе бидат околу 20 милиони ѕвезди и истражувачите се надеваат дека тој ќе открие барем 50 планети со големина на Земјата.

„ТЕС е еден вид извидник. Ние сме на научна турнеја низ целото небо. Ова е како да правиме мапа со благо. Таму има многу кул работи, само треба да ги земеме“, вели Наталија Гереро, научник од проектот ТЕС.