ПРЕМИЕРА НА „НЕ СЕГА, ДРАГА“ НА КОЛЕ АНГЕЛОВСКИ ВО ТЕАТАР КОМЕДИЈА

Скопје, (СМАРТ СДК.МК)

Вечерва во 20 часот, во Театар Комедија премиерно ќе се изведе претставата „Не сега, драга“ од Реј Куни, во режија на Коле Ангеловски.

Премиерата е во чест на шестгодишнината на театарот, како и на Светскиот ден на театарот, што се одбележува на 27 март.

Драматург на претставата е Дарко Јан Спасов, а играат Атанас Атанасовски, Жаклина Петровска, Валентин Костадиновски-Тино, Ева Скендеровска, Дарко Вељиќ, Едмонд Сотир, Кристина Ласовска, Жарко Димоски и Тања Мицков.

„Реј Куни е многу познато име во светот на комедијата и еден од најголемите живи мајстори, кој своите инспирација и начин на размислување ги црпи од Фејдо. Неговите комедии се комедии на ситуации или таканаречени булеварски комедии, без многу психологија и интелектуални мисли, но со многу брз ритам и многу врати, од кои се влегува и излегува и на тој начин се создава ритамот“, вели режисерот Ангеловски.

Сценографијата е на Илина Ангеловска, а костимите на Раде Василев.