Утре (6 декември) од 18 часот, во Домот на културата „Кочо Рацин“ во Скопје ќе бидат промовирани првите два броја од меѓународното научно списание „Балкански хип-хоп студии“.
Во списанието се објавуваат културолошки студии и теми од музиката, лингвистиката, литературата, уметноста, танцот, историјата, социологијата, филозофијата, перформативните уметности и педагогијата. Списанието е плод на долгогодишните активности на организацијата Хип-Хоп Македонија за промоција, афирмација и унапредување на хип-хопот и урбаната култура, а се појавува по повод чествувувањето на 50 години хип-хоп.
Ова списание е прво и засега единствено од ваков вид во Македонија и на Балканот и во него учествуваат професори од повеќе универзитети од регионот. Надворешни соработници се македонските хип-хоп музичари Гоце САФ, Тони Зен, Кацар и Бугимен, како и Стефан Марковски и Биљана Миловановиќ-Живак. Автори на текстовите во двата броја се членовите на редакцијата, потоа Сузи Тенева, Дејан Методијески, Татјана Вукелиќ, Вангел Ноневски, Ристо Солунчев и Виолета Дамческа.
Списанието може да се најде во печатена форма и онлајн.
