Целодневна забава за Нова година најави скопската општина Кисела вода на 31 декември пред платото на спортската сала „Расадник“. Настанот наречен „Скопска Новогодишна приказна“, започнува во 10:30 часот со настап на Балетското студио „Лебед“, а ќе продолжи со Бисера Мојаноска и театарската група „Театар за тебе“.
За децата, следи настап на „Поточиња“, аниматори и Дедо Мраз, во друштво на ликот Гринч.
Вечерната програма започнува во 20 часот со настап на групата „Куку Леле“. Продолжува со настап на Игор Џамбазов, кој е и водител на вечерта, а ќе настапи заедно со „Гуру Харе бенд“ По пауза од 15 години, настапува раперот Врчак заедно со дуото ДНК (фото). Пречекот на Новата година ќе го означи настапот на Влатко Лозаноски- Лозано.
„Со домашни музичари кои се миленици на публиката, создадовме програма која ги обединува генерациите. Ова е наш подарок не само за жителите на општината, туку за целиот град“, велат од Општината.
