Тамара Тодевска е прва од македонските пејачи која ќе одржи солистички хуманитарен концерт за настраданите во пожарот во Кочани, на 8 мај од 20 часот во Младинскиот културен центар (МКЦ). Средствата од продажбата на билетите ќе бидат наменети за семејствата на починатите граѓани, како и за сите повредени во пожарот во дискотеката „Пулс“ во Кочани на 16 март.
Поп-ѕвездата вели дека првичната идеја за овој концерт била на татко ѝ Велко Тодевски, пензиониран професор по контрабас на Факултетот за музичка уметност.
„Примарно, идејата за хуманитарниот концерт за Кочани беше на мојот еден и единствен татко Велко. Иако и јас со мојот тим разговаравме на оваа тема, правевме еден вид ‘брејнсторминг’, затоа што сакавме да направиме нешто добро и корисно за семејствата на загинатите граѓани и повредените во оваа национална трагедија која нѐ погоди сите. Велко беше поупорен и некако успеа да влијае врз мене и неизмерно сум му благодарна за тоа. Исто така, сметам дека само преку квалитетна и македонска музика можеме да им оддадеме признание на нашите колеги музичари, кои за жал нѐ напуштија прерано. Многумина ќе речат дали е време за музика и концерт сега, но да не заборавиме дека само музиката и културата можат да нѐ обединат, да нѐ направат похумани и подобри луѓе. Периодов сведочиме на многу поделби, етикетирања и пренесување на одговорноста од еден на друг. Само преку музика и култура можеме да бидеме едно, а притоа да бидеме и хумани, затоа што сите средства од концертот ќе бидат донирани“, вели Тамара Тодевска.
Таа беше блиска соработничка и пријателка со членовите на „ДНК“. Во пожарот загинаа и пејачот на „ДНК“, Андреј Ѓорѓиески, гитаристот Александар Коларов, тапанарот Ѓорги Ѓоргиев, придружниот вокал Сара Пројковска која беше професорка на ФМУ, клавијатуристот Филип Стевановски, инаку директор на Центарот за култура во Штип и Мартин Атанасовски, кој настапуваше со бендот како битбоксер. Владимир Блажев-Панчо, другиот пејач и коавтор на хитовите на „ДНК“, е на лекување во скопска приватна болница.
„Со Андреј и Сара имам навистина преубави спомени, заеднички настапи, свирки, концерти. Можеби не се дружевме на дневно ниво, но кога би се виделе, беше посебно уживање. Ја имав честа да бидам дел и од големиот концерт на ‘ДНК’, кој се одржа во ‘Борис Трајковски’, каде што ја испеавме нашата ‘Фрази љубовни’. Прифатив без двоумење и навистина тој заеднички настап засекогаш ќе остане дел од мене. Сара… не знам дали постојат доволно зборови за да се опише таа добра душа, музички талент, професионалност, но и жртва за сѐ што правеше за своите деца и семејство. Многу ми е тешко што добри луѓе си заминуваат, а нашиот систем не успеа да ги заштити своите деца, младите луѓе, а потоа и сите талентирани уметници – музичари кои творат во навистина тешки услови“, ни рече Тамара.
Во Кочани, таа немала многу настапи, освен на почетокот на кариерата, кога имала турнеја низ повеќе наши градови, па и Кочани бил опфатен.
„Знаете како, кога настапувате во помалите наши градови таму енергијата е навистина посебна, публиката ви возвраќа со многу љубов, енергија и после секој настап се чувствувате исполнето. Ќе биде многу тешко да се вратиме сите во колосек, но најтешко е за семејствата на загинатите и повредените наши сограѓани. Затоа мора да помагаме, секој во својот домен, преку својата професија и тоа што најдобро знае да го прави“, додава Тодевска.
М. ЏАРОВСКА
Тамара Тодевска со татко си Велко на промоцијата на книгата „Велко Тодевски: уметност и педагогија на контрабас“
Фото: К.Попов
