Албанскиот премиер Еди Рама, кој претпладнето беше на средба со лидерите на партиите на Албанците во Македонија и со лидерот на ВМРО-ДПМНЕ, задоцни на бизнис САМИТ100 за бизнисмените од Југоисточна Европа, што вчера и денес се одржа во Скопје.
Поради доцнењето тој немаше време за кафе, бидејќи веднаш почна премиерската панел дискусија, на која освен Рама учествуваа и премиерот на Македонија Зоран Заев, премиерот на Црна Гора Душко Марковиќ и претседателот на Советот на министри на Босна и Херцеговина Денис Звиздиќ.
По завршување на панел дискусијата, според протоколот беше предвидена заедничка прес конференција на четворицата премиери, но Рама побара пауза за цигара. Тој праша каде овде се пуши, а македонски премиер Заев го повика да одат надвор пред хотелот на цигара.
Рама на бизнис самитот беше ѕвезда. Тој се појави во црни патики, црн костим и црвена вратоврска.
