Претставата „Планинските џинови“ од Луиџи Пирандело, во режија на реномираниот италијански режисер Паоло Маџели, ќе се изведе вечерва (20 часот) во Македонскиот народен театар.
Претставата е дел од регионалниот проект „(Ре)Откривање на Европа“, кофинансиран од програмата на ЕУ, Креативна Европа, и е копродукција на пет театри од Хрватска, Италија, Србија и Романија, а од Македонија учествуваат актерите Џевдет Јашари и Фисник Зеќири од Албанскиот театар.
Премиерата на „Планинските џинови“ беше на 2 март во Риека, по што следеа изведбите во Трст, Темишвар и во Суботица. Вечерва е скопската премиера, а закажани се и репризи на 27 и 28 април.
Претставата се изведува на италијански, словенечки, албански, унгарски и на германски јазик, а во Скопје ќе биде обезбеден титл на албански и на македонски.
„Планинските џинови“ е последното дело на Луиџи Пирандело, добитник на Нобелова награда за литература.
