Со стоечки овации и долг аплауз, публиката во полниот Македонски народен театар (МНТ) синоќа ги поздрави триесетината танчари од Академијата за танц од Пекинг, по изведбата на претставата „Фен Мо“.
Специјалната јавна обвинителка Катица Јанева со пријателки на гостувањето на кинеската претстава „Фен Мо“. Откако помина половина претстава, таа со друштвото набрзина го напушти театарот (Фото: M. Златевска )
Публиката составена од претставници на високиот државен врв, дипломати, актери, како и од претставници од Специјалното јавно обвинителство, преку спектарот од боите на костимите и енергијата на кинеските уметности, уживаше во магичното патување низ древната Кина.
Претставата е инспирирана од сликарството на древна Кина, илустрирана со традиционална кинеска музика. Кореографот ги преточува потезите на сликарот со четката во движење и ритам, создавајќи ги сликата и мистиката на Кина (Фото: М. Златевска)
Со оваа претстава, стартуваше годинашното 14. по ред издание на „Танц фест Скопје 2018“, а уметничката директорка Рисима Рисимкин додава оти 2018-та е Година на танцот.
По завршувањето на претставата и долгите поклон и аплауз, потпретседателот на Академијата од Пекинг Џанг Цјанг ги доведе на сцена претседателот на Македонија, Ѓорге Иванов и неговата сопруга Маја. Тие заедно со танчарите, како и со Рисима Рисимкин, кинеската амбасадорка во Македонија Лин Лисјен и со министерот за култура Роберт Алаѓозовски направија групна фотографија за спомен (Фото: M. Златевска)
Академијата од Пекинг е на турнеја во Европа, во понеделникот настапија во Велес, а оттука заминуваат за Бугарија, Унгарија и Полска.
Актерката и продуцентка Лабина Митевска, со мајка ѝ и ќеркичката (Фото: M. Златевска)
Гостувањето во Македонија го организираше културниот центар „Интерарт“, со посредство на амбасадата на Народна Република Кина во Скопје.
ТВ-водителката Ирена Спировска меѓу гостите (Фото: M. Златевска)
